СЕВИЛЬДІК ШАШТАРАЗ

Түнгі Севильдің тыныштығын серенада үні бұзады. Өзін кедей жігіт Линдор деп таныстырған граф Альмавива сұлу Розинаға махаббаты жайлы ән шырқайды. Розина серенаданы ұнатқанымен, кездесуге шыға алмайды. Қыздың қамқоршысы доктор Бартоло оның басқан ізін аңдиды. Бартолоның жас қызға үйленуден дәмесі бар. Үнемі көңілді жүретін шаштараз Фигаро графқа Бартолоның үйіне солдат киімін киіп кіруге ақыл береді.

Бартолоның үйі. Розина Линдор жайлы тәтті қиялға берілуде. Бартоло оған бөгет бола алмайды. Қыз өз тағдырын сүйіктісімен қосуға шешім қабылдап, осы жайлы жазған хатын Фигаро арқылы Линдорға жібереді. Бартоло да қарап отырған жоқ. Музыка мұғалімі Базилионы шақырып алып, қарсыласын жеңудің жолдарын іздеп, онымен ақылдасады. Базилио өсек таратуды ұсынады.

Кенет есік ашылып, үйге мас солдат кейпіндегі Альмавива кіреді. Өзіне бөлме босатуды талап еткен солдатқа үйінің жалға беруден босатылғанын айтып түсіндіргісі келгенінен еш нәтиже шықпайды. У-шу кезінде Альмавива Розинаға хат беруге тырысады. Айқай-шудың себебін анықтамақ болып келген күзетшілердің бастығы Бартолоның сөзінен кейін жалған солдатты қамамақ болады. Граф оған өзінің кім екенін түсіндіреді. Офицер барлығын таңқалдырып, кетіп қалады.

Альмавива Бартолоның үйіне ауырып қалған Базилионың орнына Розинаға сабақ беруге келеді. Музыка сабағының үстінде, ғашықтар аймаласып отырғанда Базилио келеді. Үйіне қайтуын сұрағанға келіспеген Базилио тек графтың ақша салынған әмиянын алған соң ғана кетеді. Базилио кеткен соң Фигаро доктордың сақалын ала бастайды. Розина сүйіктісімен қашып кетудің жолдарын қарастыруда. Бартоло Розинаға оны графтың алдап жүргенін айтады. Алдандым деп ашуланып, қатты қамыққан Розина Бартолоға қашу жоспарын да айтып салады.

Найзағай ойнап, күн күркірейді.

Граф пен Фигаро Розинаны алып кетуге келеді. Қыз олармен бірге барудан бас тартады. Линдорды өзін алдағаны үшін өкпелеп, артынан Линдор мен Альмавиваның бір адам екені анықталған соң бәрі шешіледі. Розина өзін бақытты сезінеді. Базилио нотариусты ертіп келеді. Оларды Бартоло неке шартын жасау үшін шақырған.

Бартолоның жоқтығын пайдаланған Фигаро нотариустың Альмавива мен Розинаның некесін тіркеу үшін шақырылғанын айтады. Қарсылық көрсеткісі келгенімен Базилио графтың қомақты сыйлығын алған соң, неке шартына қолын қояды.

Розинаның байлығынан айырылатындығын ойлап, Бартоло қатты қамығуда. Оның абыржыған кейпіне жаны ашыған Альмавива қыздың бар ақшасын Бартолоға қалдырады.